Aðalfundur 2021

Skráning í mót
Leiðbeiningar
  Næstu mót
16
júní
Opið mót – ræst út af öllum teigum klukkan 18:00
25
júní
Jónsmessan
05
júlí
Meistaramót
06
júlí
Meistaramót
07
júlí
Meistaramót

  Skráning í klúbbinn
  Fréttabréf vikunnar
Dagskrá framundan
  23.05.2022

FORKEPPNI BIKARS Á FIMMTUDAGINN.

Næstkomandi fimmtudag (26. maí) verður forkeppni bikars leikin. Í forkeppninni er leikin 9 holu punktakeppni með forgjöf. 16 efstu komast áfram í karla og kvennaflokki og leika útsláttarkeppni. Sá sem lendir í fyrsta sæti í forkeppninni leikur við þann sem lendir í 16. sæti o.s.frv.

Skráning í mótið fer fram í mótaskrá á golf.is/golfbox.

Ræst er út á eftirtöldum tímum:

10:30-10:50
13:30-14:20
15:30-16:20
17:30-18:20

Þeir sem vilja ekki vera með í mótinu skrá sig á rástíma á öðrum tímum þennan dag.

Ekkert þátttökugjald. Það er líka hægt að skrá sig í mótið og sleppa því að skila inn skori ef félagar vilja alls ekki vera með í keppninni. Annars hvetjum við alla til þess að vera með.

GOLFNÁMSKEIÐ OG ÆFINGAR Í SUMAR

Fyrir stráka og stelpur á aldrinum 8 – 14 ára.

Golfnámskeiðið verður frá klukkan 9:00 til 11:30 þann 13., 14., 15. og 16. júní.

Markmiðið er að vekja áhuga krakkanna á golfíþróttinni og býðst þeim sem mæta á golfnámskeiðið að mæta á skipulagðar æfingar hjá Golfklúbbnum Setbergi sem verða tvisvar sinnum í viku í sumar. Æfingarnar verða á miðvikudögum frá klukkan 17:00 til 18:00 og á laugardögum frá klukkan 10:00 til 11:00. Með þessu vonumst við til að viðhalda þeim áhuga sem oft myndast hjá krökkum á golfnámskeiðum. Þeir sem taka þátt í námskeiðinu og/eða æfingunum mega spila á æfingavellinum í sumar.

Dagskrá námskeiðsins:

Farið er yfir helstu golfsiði og reglur.

Farið er yfir helstu undirstöðuatriði golfíþróttarinnar, s.s. grip, sveiflu, vipp og pútt.

Leikið golf á æfingavelli Golfklúbbsins Setbergs.

Allir eiga að taka með sér hollt og gott nesti.

Síðasta morguninn verður boðið upp á pylsur ásamt því að allir fá afhent viðurkenningarskjal.

Verðið fyrir allt framangreint er 15.000 kr.

Skráning fer fram með því að senda tölvupóst á netfangið gse@gse.is eða með því að hringja í síma 773 7993.

Nánari upplýsingar má fá með því að senda tölvupóst á netfangið gse@gse.is eða hringja í síma 844 3589.

SKRÁNING Á RÁSTÍMA

Við viljum minna á reglurnar um skráningu á rástíma í gegnum Golfbox.

Við ætlum að hafa reglurnar þannig að félagar í klúbbnum hafi forgang að rástímum.

Félagar í GSE geta skráð sig á rástíma með þriggja daga fyrirvara.

Skráning opnar klukkan 20:00. Aðrir geta skráð sig á rástíma daginn fyrir viðkomandi leikdag. Skráning opnar klukkan 22:00.

Einungis konur í GSE geta skráð sig á rástíma í kvennatímana á mánudögum. Endilega skráið ykkur í Kvennaklúbb GSE á Facebook til þess fylgjast með fréttum.

Einungis karlar í GSE geta skráð sig á rástíma í karlatímana á þriðjudögum. Endilega skráið ykkur í Karlaklúbb GSE á Facebook til þess fylgjast með fréttum.

Við ætlum að halda því í algjöru lágmarki að taka frá rástíma fyrir fyrirtæki og hópa. Með þessu vonumst við til þess að aðgengi félaga í klúbbnum að rástímum verði viðunandi.

NÝLIÐANÁMSKEIÐ

Miðvikudaginn 1. júní n.k. verður haldið nýliðanámskeið.

Námskeiðið byrjar í golfskálanum klukkan 20:00.

Á námskeiðinu verður farið yfir:

  • Golfbox og golf.is.
  • Helstu golfreglur.
  • Helstu siðareglur.

Golfkennararnir í klúbbnum kynna sig og það sem þeir hafa upp á að bjóða

ÆFINGASVÆÐIÐ

Kúluvélin verður tekin fram og æfingasvæðið formlega opnað um leið og svæðið verður þurrt. Verður vonandi í næstu viku.

stjórnin.

Hreinsunardagur og opnun sumarflata
  28.04.2022

Laugardaginn 30. apríl verður hreinsunardagur á vellinum. Vinnan hefst klukkan 10:00 og verður unnið til klukkan 13:00. Þeir sem taka þátt í vinnunni geta spilað völlinn að vinnu lokinni inn á sumarflatir. Ræst verður út af öllum teigum samtímis.

Helstu verkefni eru:

  • Tína rusl
  • Smíða nýjar brýr á níundu braut
  • Klæða vélageymslu
  • Tína grjót
  • Mála og fleira

Smiðir og aðrir áhugamenn um brúarsmíði mega því taka með sér viðeigandi verkfæri.

Boðið verður upp á pylsur að vinnu lokinni.

Nokkrir félagar sem ekki komast á laugardaginn, en vilja leggja sitt af mörkum, ætla að mæta á föstudaginn klukkan 16:00 og byrja á framangreindum verkefnum. Allir eru að sjálfsögðu velkomnir á þeim tíma. Þeir sem mæta á föstudeginum eru að sjálfsögðu gjaldgengir í að spila á laugardeginum. Við reiknum með að byrja að spila um klukkan 13:30.

Vegna vinnunnar verður völlurinn lokaður frá klukkan 14:00 á föstudaginn og á laugardaginn. Rástímabókun fyrir sunnudaginn opnar fyrir félaga í dag klukkan 20:00.

Völlurinn verður einungis opinn fyrir félaga í klúbbnum fyrstu dagana.

 

 

Ýmsar upplýsingar
  23.04.2022

Ágætu félagar.

Við viljum vekja athygli á nokkrum atriðum.

Völlurinn er núna einungis opinn fyrir félaga í klúbbnum.
Við biðjum félaga að skrá sig alltaf á rástíma í Golfbox svo starfsmenn eigi auðveldara með að hafa eftirlit með spili á vellinum.

Við verðum ekki með starfsmann í ræsishúsinu fyrr en í byrjun maí.

Vallarstarfsmenn munu sinna eftirliti á vellinum þangað til og því mjög mikilvægt að þeir geti séð hverjir eru skráðir á rástíma hverju sinni.

Ástand vallarins:

Völlurinn kemur ágætlega undan vetri og ætti að vera í góðu ástandi í sumar. Það ræðst af veðrinu næstu daga og vikur hvenær opnað verður inn á sumarflatir.

Við munum auglýsa opnun sumarflata um leið og tímasetning liggur fyrir.

Við biðjum þá sem spila í vor að ganga varlega um völlinn og helst færa boltann af brautunum áður en slegið er.

Helstu mótin í sumar:

25.05.2022 Forkeppni bikars - innanfélagsmót
25.06.2022 Jónsmessa - innanfélagsmót
06.07.2022 Meistaramót dagur 1 - innanfélagsmót
07.07.2022 Meistaramót dagur 2 - innanfélagsmót
08.07.2022 Meistaramót dagur 3 - innanfélagsmót
09.07.2022 Meistaramót dagur 4 - innanfélagsmót
01.08.2022 Opna Setbergsmótið - opið mót
11.08.2022 Íslandsmót unglinga 14 ára og yngri
12.08.2022 Íslandsmót unglinga 14 ára og yngri
12.08.2022 Íslandsmót unglinga 14 ára og yngri
01.10.2022 Bændaglíma - innanfélagsmót

Í mótaskránna vantar nokkur innanfélagsmót. Endanleg mótaskrá verðu send í næsta pósti.

Skráning í klúbbinn og greiðsla árgjalds.

Lokað hefur verið fyrir skráningu í klúbbinn á þessu ári.

Nokkrir aðilar eru núna skráðir á biðlista.

Enn eru örfáir sem hafa ekki gengið frá greiðslu árgjalds eða sagt sig úr klúbbnum. Viðkomandi eru beðnir um að ganga frá greiðslu árgjalds, eða segja sig úr klúbbnum kjósi þeir svo, fyrir lok dags þann 20. apríl n.k. Eftir það verða viðkomandi teknir af skrá og aðilum á biðlista boðin aðild að klúbbnum.

Ekki er heimilt að hefja leik á vellinum fyrr en gengið hefur verið frá greiðslu árgjalds.

Pokamerki og kvittanir fyrir árgjöldum:

Við munum senda tölvupóst þegar pokamerki verða reiðubúin til afhendingar.

Þeir sem vilja fá kvittun fyrir greiðslu árgjalds er bent á að hafa samband við Davíð Kristján Hreiðarsson (david@keilir.is) eða (felagaskra@gse.is) eða (5653360).

Upplýsingar um starfsemi klúbbsins í sumar:

Upplýsingar um starfsemi klúbbsins í sumar verða sendar/birtar með eftirfarandi hætti:

  • Undir liðnum fréttir/mikilvæg skilaboð á Golfbox.
  • Á Facebook-síðunni Allir í GSE. Við hvetjum alla félaga að gerast aðilar að þeim hópi.
  • Á heimasíðu klúbbsins www.gse.is.

Ekki verður sendur tölvupóstur en félagar geta breytt stillingum á Golfbox og valið að fá tilkynningar sem eru birtar á Golfbox sendar með tölvupósti úr kerfinu (Leiðbeiningar stilling tilkynningum - Google Docs).

Stjórnin.

Aðalfundur 2021 og árgjöld
  15.12.2021

Aðalfundur GSE var haldinn þann 7. desember s.l.

Á heimasíðu klúbbsins www.gse.is má sjá ársskýrslu fyrir 2021.

Á aðalfundinum voru ákveðin árgjöld fyrir árið 2022 sem eru svohljóðandi:

  • 18 ára og yngri: kr. 26.000.
  • 19 - 25 ára: kr. 52.000.
  •  Aðrir: kr. 78.000.

Í árgjaldinu er innifalin inneign að fjárhæð 2.000 kr. í verslun í golfskálanum.

Eftirfarandi greiðslumöguleikar eru í boði:

1) Staðgreiðsla. Greiða skal inn á reikning klúbbsins í Landsbankanum nr. 0133-26-013522, kt. 630295-2549. Senda skal staðfestingu um greiðslu á netfangið felagaskra@gse.is. Ef greitt er fyrir fleiri en einn félaga þá skal þess getið í staðfestingunni.

2) Greiðsluseðlar. Greiðslunni skipt í þrennt og birtist í heimabanka félaga. Gjalddagar eru 1. febrúar, 1. mars og 1. apríl.

3) Kreditkort. Ef greitt er með kreditkorti þá er hægt að skipta greiðslunni í 6 jafnar greiðslur frá 1. febrúar til 1. júlí. Þeir sem greiddu með korti í fyrra þurfa ekki að hafa samband, nema þeir vilji nota annað kort en það sem notað var í fyrra. Aðrir sem vilja greiða með kreditkorti hafi samband með því að senda tölvupóst á netfangið felagaskra@gse.is eða í síma 565 3360 fyrir 15. janúar n.k. Ef greitt var með korti í fyrra en ekki er hægt að endurnýja samninginn hjá færsluhirði þá verða gefnir út greiðsluseðlar fyrir árgjaldinu.

Þeir sem ætla ekki að vera áfram í klúbbnum eru vinsamlegast beðnir um að senda tölvupóst á netfangið felagaskra@gse.is eða hringja í símanúmerið 565 3360. Það er talsvert um umsóknir í klúbbinn og því mikilvægt að vita sem fyrst hvort félagar ætla að hætta í klúbbnum. Við ætlum ekki að fjölga félögum umfram þann fjölda sem núna er í klúbbnum.

Mótskrá fyrir árið 2022 er komin inn á heimasíðuna.

Aðalfundurinn á morgun.
  06.12.2021

EKKI ER GERÐ KRAFA UM NEIKVÆÐA NIÐURSTÖÐU ÚR HRAÐPRÓFI.

Við afsökum hringlandaháttinn á þessu en við höfum ákveðið að fara ekki fram á neikvæða niðurstöðu úr hraðprófi á aðalfundinum.

Salnum verður skipt upp í tvö 50 manna hólf.

Þetta er sama leið og aðrir klúbbar á höfuðborgarsvæðinu, sem halda sinn aðalfund á sama tíma, hafa ákveðið að fara.

  Styrktaraðilar