Félagsfundur GSE var haldinn 4. júní s.l. í sal Félags eldriborgara í Hafnarfiði við Flatahraun.

Dagskrá fundarins og niðurstöður má sjá í fundargerð með því að smella á hlekkinn hér fyrir neðan.

Fundargerð

Kæru félagar

Stjórn Golfklúbbsins Setbergs boðar til félagsfundar  miðvikudaginn 4. júní nk.

Fundurinn verður haldinn að Flatahrauni 3, Hafnarfirði (salur félags eldri borgara í Hafnarfirði).

Fundurinn hefst stundvíslega klukkan 18:00.

Dagskrá:

1. Tillaga um samstarf við Golfklúbbinn Keili vegna uppbyggingar á nýjum golfvelli.

Lagt er til að klúbburinn gangi til samstarfs við Golfklúbbinn Keili vegna fyrirhugaðrar uppbyggingar á nýjum golfvelli í upplandi Hafnarfjarðar. Lagt er til að stjórn klúbbsins verði falið að semja um og útfæra samstarfið.

2. Tillaga um að lengja tímann sem er frátekinn fyrir karla- og kvennastarfið.

Lagt er til að sá tími sem er frátekinn á mánudögum fyrir kvennaklúbbinn og þriðjudögum fyrir karlaklúbbinn verði lengdur um allt að eina og hálfa klukkustund.

3. Önnur mál.

Undir liðnum önnur mál verður m.a. fjallað um stöðuna á Setbergsvelli ásamt því að rætt verður um þá möguleika sem eru fyrir hendi ef nýr völlur í Hafnarfirði verður ekki tilbúinn þegar klúbburinn missir núverandi völl.

Greinargerð með tillögu 1:

Klúbburinn, sem er aðili að Íþróttabandalagi Hafnarfjarðar („ÍBH“), hefur um nokkurra ára skeið sóst eftir nýju landi í Hafnarfirði undir sína starfsemi. Klúbburinn hefur þennan tíma verið á lista ÍBH um forgangsröðun verkefna og styttist nú í að komi að þeim lið, en hann er nú svohljóðandi:

2022-2027 lagður nýr 27 holu golfvöllur fyrir Golfklúbbinn Setberg í samstarfi við Golfklúbbinn Keili og önnur íþróttafélög í Hafnarfirði. Áfram verði unnið að hönnun og öðrum nauðsynlegum undirbúningi. 

Síðastliðið haust óskaði Golfklúbburinn Keilir eftir því að fá meira svæði undir sína starfsemi enda annar núverandi svæði þeirra ekki þeirri eftirspurn sem er í Golfklúbbinn Keili.

Á sama tíma ítrekaði Golfklúbburinn Setberg óskir sínar um að fá svæði undir sína starfsemi enda liggur fyrir að klúbburinn mun missa núverandi aðstöðu á næstu árum.

Bæjarráð Hafnarfjarðar skipaði í framhaldi af þessu starfshóp um verkefnið – Golfklúbburinn Setberg, nýr golfvöllur, framtíðarsvæði. Starfshópurinn hefur unnið þetta verkefni samhliða því að nú á sér stað endurskoðun á aðalskipulagi Hafnarfjarðar.

Starfshópurinn óskað eftir svörum frá báðum golfklúbbunum og sendum við svarbréf fyrr á þessu ári. Í framhaldi af því óskaði starfshópurinn eftir því að klúbbarnir tveir sameinuðust um uppbyggingu á nýjum golfvelli.

Stjórn klúbbsins, framtíðarnefnd og fulltrúar karla-  og kvennaklúbbsins áttu fund og fóru yfir málið. Var þar samþykkt að það þjónaði hagsmunum félaga best að verða við áskorun starfshópsins. Hafa klúbbarnir unnið drög að bréfi sem er svohljóðandi, sem verður sent á starfshópinn, ef tillagan verður samþykkt:

Starfshópur vegna nýs golfvallarsvæðis í Hafnarfirði.

Vísað er til fyrri samskipta milli starfshópsins og Golfklúbbsins Setbergs annars vegar og Golfklúbbsins Keilis hins vegar, vegna fyrirhugaðrar uppbyggingar á nýjum golfvelli í upplandi Hafnarfjarðar.

Fulltrúar starfshópsins hafa átt samskipti við fulltrúa golfklúbbanna í ferlinu og óskað eftir þeirra sjónarmiðum og athugasemdum. Golfklúbbarnir eru sammála um að sameinast um komandi uppbyggingu til heilla fyrir golfíþróttina og samfélagið allt í Hafnarfirði.

Golfklúbbarnir lýsa því hér með yfir vilja til þess að sameinast um verkefnið í samstarfi við starfshópinn. Munu golfklúbbarnir gera með sér samstarfssamning um verkefnið í kjölfar þessa bréfs og koma sér saman um tillögu að verkefnastjóra verkefnisins. Eins og öllum ætti að vera ljóst, er gríðarleg þörf á fleiri golfholum á höfuðborgarsvæðinu, sérstaklega þar sem Golfklúbburinn Setberg mun missa núverandi aðstöðu á næstu árum og ásókn í golfklúbbana er langt umfram það sem núverandi vallarsvæði þeirra getur annað.

Golfklúbbarnir skora hér með á Hafnarfjarðarbæ að hefja þegar í stað nauðsynlega vinnu til þess að uppbyggingin geti hafist sem fyrst. Fyrir liggur umfangsmikil og tímafrek skipulagsvinna og því mikilvægt að hefja ferlið án tafar. Enn fremur er þess farið á leit við Hafnarfjarðarbæ að  tekið verði tillit til framkvæmdarinnar í fjárhagsáætlun bæjarins.

Það er vilji golfklúbbanna að farið verði í verkefnið í fullri sátt við samfélagið og önnur íþróttafélög í Hafnarfirði. Samkvæmt forgangsröðun Íþróttabandalags Hafnarfjarðar, er röðin komin að golfinu.

Virðingarfyllst,

Hafnarfirði, [•] 2025.

F.h. Golfklúbbsins Setbergs:                                                                   F.h. Golfklúbbsins Keilis:

Þar sem þetta er ekki í samræmi við það sem hefur verið samþykkt á aðalfundum klúbbsins á sl. árum ákvað stjórnin að leggja tillöguna fyrir félagsfund. Þetta getur þýtt breyttar áherslur hvað varðar framtíðarsýn klúbbsins, svo sem hvað varðar umsvif í starfseminni, þar til fyrir liggur hvernig rekstur og starfsemi verður á nýjum velli.  

Greinargerð með tillögu 2:

Þátttaka í karla- og kvennastarfinu hefur aukist jafnt og þétt á sl. árum Nú er svo komið að það fyllist mjög fljótt í þá tíma sem eru ætlaðir fyrir þetta starf innan klúbbsins. Á síðasta aðalfundi var rætt að lengja ekki þennan tíma til þess að þeir aðrir félagar, sem ekki taka þátt í karla-  eða kvennastarfinu, geti komist í golf á þessum dögum. Komið hefur fram tillaga að lengja tímann um allt að eina og hálfa klukkustund á hvorum degi, enda reynist þörf á því að lengja tímann. Verður þá heimilt að ráðstafa rástímum frá 14:30 til 19:00 undir þetta starf. Byrjað verði á því að opna rástíma frá 15:30 til 18:30 en sá tími lengdur ef mót á mánudegi eða þriðjudegi er orðið fullt sólarhring eftir að skráning opnar fyrir viðkomandi dag.

Þetta starf er að mati stjórnar mjög mikilvægt og virkilega gaman að sjá hvað margir félagar hafa nýtt sér þetta og í mörgum tilvikum eignast nýja vini og spilafélaga. Við megum samt ekki gleyma því að aðrir þurfa líka að komast í golf á þessum dögum. Það verður því að taka tillit til beggja sjónarmiða. Aðrir félagar komast þá fyrir og eftir þá tíma sem ætlaðir eru fyrir þetta starf.  

Virðingarfyllst, stjórn Golfklúbbsins Setbergs. 

Sumarið 2025.
Fyrir krakka á aldrinum 8 – 13 ára (fædd 2012 – 2017).

Dagskrá:

• Farið er yfir helstu golfsiði og reglur.
• Farið er yfir helstu undirstöðuatriði golfíþróttarinnar, s.s. grip, sveiflu, vipp og pútt.
• Leikið golf á æfingavelli Golfklúbbsins Setbergs.
• Allir eiga að taka með sér hollt og gott nesti.
• Síðasta morguninn verður boðið upp á pylsur ásamt því að allir fá afhent viðurkenningarskjal.

Golfnámskeiðið verður frá klukkan 9:00 til 12:00 frá 10. til 13. júní.

Markmiðið er að vekja áhuga krakkanna á golfíþróttinni og býðst þeim sem mæta á golfnámskeiðið að mæta á skipulagðar æfingar hjá Golfklúbbnum Setbergi að námskeiðinu loknu sem verða einu sinni í viku í sumar. Æfingarnar verða á mánudögum frá klukkan 17:00 til 18:00 í fyrsta sinn þann 16. júní 2025. Með þessu vonumst við til að viðhalda þeim áhuga sem oft myndast hjá krökkum á golfnámskeiðum. Þeir sem taka þátt í námskeiðinu mega spila á æfingavellinum í sumar.

Verðið fyrir allt framangreint er 15.000 kr.

Skráning fer fram á Sportabler: https://www.abler.io/shop/gse/
Umsjón með golfnámskeiðinu og æfingunum hafa afrekskylfingarnir Styrmir Guðmundsson og Júlíus Hallgrímsson. Þeim til aðstoðar verða ungmenni sem eru að æfa hjá Golfklúbbnum Setbergi.

Nánari upplýsingar má fá með því að senda tölvupóst á netfangið gse@gse.is.

Kæru félagar.
Gleðilegt sumar.

Fimmtudaginn 1. maí nk. verður hreinsunardagur á vellinum. Undanfarin ár hefur þátttaka verið góð og við vonum að svo verði einnig í ár. Vinnan hefst klukkan 10:00 og verður unnið til klukkan 13:00. Þeir sem taka þátt í vinnunni geta spilað völlinn að vinnu lokinni inn á sumarflatir. Ræst verður út af öllum teigum samtímis. Stefnum á að byrja að spila um klukkan 14:00. Ekki verður hægt að skrá sig á rástíma þennan dag.

Ef veðurspáin fyrir fimmtudaginn breytist til hins verra þá skoðum við að fresta hreinsunardeginum yfir á föstudaginn 2. maí klukkan 16:00. Við munum því ekki opna strax fyrir skráningu á rástíma á föstudaginn. Við munum tilkynna hér hvenær við opnum fyrir skráningu á föstudaginn.

Þeir sem geta mega taka með sér verkfæri (garðhrífur og skóflur).

Boðið verður upp á pylsur að vinnu lokinni.

Völlurinn verður einungis opinn fyrir félaga í klúbbnum fyrst um sinn.

Skráning á rástíma fer fram í gegnum Golfbox. Rástímabókun opnar fjórum dögum fyrir viðkomandi leikdag.